Friday, May 30, 2008

鴿洞

據說,香港女多男少和娶妻北移的現象愈來愈嚴重,處於適婚年齡而找不到著落的女性高達六位數。一眾港男聞之,自是拍爛手掌,覺得揚眉吐氣了,亦紛紛撰文以示鼓舞。弄得這個話題,被講得太爛太悶,小弟也不想細說。反而想談談為何這個現象對市場環境其實毫無影響。

按理說,港女們應會心下惴惴,為了排除萬難找到著落,不單要從心底裡改善品質,放下身段,不再趾高氣揚頤指氣使,偶爾還可能和港男來個AA。

同時,她們還會把期望降低少許,不再整天慨嘆「好男人都死到哪裡去了」,不再奢想能找到優質港男。她們不單會減少跟港男們談論沙士比亞和尼釆,亦會逐漸提高對賭波和賭馬的容忍度,還會學著欣賞《古惑仔online》的玩法設計。

對不起,以上這些事,通通都沒有發生。

對於那些報導,港女們可謂驚都未過。何解?皆因報導歸報導,這些數據從沒影響到港女們的感情生活。她們的追求者,也從沒因此而減少過。據小弟以偏概全的觀察,我所認識的女性幾乎全都不乏追求者,即使有些女子著實其貌不揚,還是有二三蜂蝶拜於石榴裙下。

「我大把人追,真係驚都未過」不少年屆30雲英未嫁的港女都從不擔心。人的自信心,畢竟需由別人的認同而建立,而對自身競爭力的評估,自亦建基於這些戰績。不過問題來了,不是說女多男少娶妻北移嗎?港男缺市下,如果每個港女都擁有複數的追求者,那麼這條數如何Balance得到?

這個問題,留待看倌自己解答。執筆至此,我反倒想起了一個定律。

少年求學時,誤闖數學系修了一門課,叫離散數學。當中學到了一個關於鴿子洞的無聊東西,由德國數學家Dirichlet於百多年前首先提出。

話說你有M個鴿子洞和N樣物品,N比M為多。如果你要將N樣物品悉數放進鴿子洞中,那總會有一個或以上的鴿子洞存有複數物品的。這個現象,是為《鴿子洞定律》。

45 comments:

天海和尚 said...

就係因為呢種錯覺,害死了不少港女。

好多人到左30歲都仲未嫁得出, 但又仍然係有唔少人追, 仲諗住自己競爭力好好。

誰不知, 你醒我都唔笨, 一個港男又點會追一個港女咁少? 到最後 allocate 盡晒, 好多港女就終於都發現原來佢地係 allocate 唔倒架囉。

當初既好多人追, 冇錯係事實, 但結唔結倒婚就係另一回事。造成一種競爭力的假像。

Anonymous said...

我覺得整篇文章的精緒, 就係「優質港男」條 link 喎, hahahaha

「會計佬 + 識寫Blog + DBS畢業 + 識拉小提琴 + 仲要識唱歌」

咁o既優質港男, 一早就遠走他國啦, 唔怪得我地港女慨嘆「好男人都死到哪裡去了?」 架播


港女 Jane 字

Elvis said...

天海,

就算能結婚, 也還是離不開《鴿子洞定律》, 總之大家小心吧。

Elvis said...

Jane,

我其實真係好想寫返篇關於 「好男人都死到哪裡去了?」這個問題

黑人 said...

好男人都死到哪裡去了?

台灣的阿飛。不會飛已經寫過呢題
http://blog.pixnet.net/felixchung

佢本書在page one 有得賣了(內容跟返個blog)

Elvis said...

我知佢寫過亦都睇過

cheryl said...

死喇唔明
哦咁假設如果一位港女冇人追又同時追幾男仔呢?

P.S.,JANE --「優質港男」除了是「會計佬 + 識寫Blog + DBS畢業 + 識拉小提琴 + 仲要識唱歌」,仲有把「防更年期聲線」。莫講流淚,高潮都有之。

又,TK,台灣仔真係好HOT~

Elvis said...

cheryl,

"一位港女冇人追又同時追幾男仔"

呢件事我相信唔會係香港發生, 有都應該係一個異數.......

Anonymous said...

cheryl,

真係咁high? 有冇 link 可以聽下?

其實今天優質港男真係唔多呢......

港女 Jane 字

david Sleeper said...

閣下寫的東西真是愈來愈絕,先欽敬一下。
唔唔,真是寫得乎合現實。就如我為例,20來歲時同一時間只會放資源在一個女人身上。現在,卻有幾條魚絲握在手中。以前給人當魚般釣,現終可以以其人之道。

過內人 said...

係o個類人就配返o個類人。

唔係好男人/好女人走晒,而係你港男/港女,你就好難配對到好男人/好女人。


有部份人一面係港男,一面係好男;見人講人講人話;見鬼講鬼話。

佢話:「我做好人都得,之不過,你都做初一,我怕乜做十五呢??」

「無好結果喎。」我問

「係呀,係佢啫。你又唔係唔知我要乜。我o的果半個鐘內實結出來。」

cheryl said...

Elvis, 好多港女都真係冇人追O架,咁條FORMULA係唔係要再砌過...? 即係n = or > m咁呢...不過依你咁講仲有個X,什至Y啦。有外援嘛。(SORRY,我係慢咗D/DOOD咗D...)

Jane, 你問呀港男攞電話。我MSN佢佢話好想識你喎!!!

Elvis said...

cheryl,

我發覺你真係好早起身。

cheryl said...

chey~
你晚上12時半我才下午4時半
唔好玩啦早?
我唔洗做o架嘛...

暗黑的卡夫卡 said...

Elvis兄:
個link寫果個人係虛構個渦...

cheryl:
果個人我MSN佢佢話好想ABCD你喎!!

cheryl said...

咩叫ABCD? 火星文乎?
唔好咁小器啦

(sorry呀Elvis,優質港男咁優質,禁不住要喺你地頭flirt吓pimp吓。)

Anonymous said...

還是想知道, 大家到頭來點算呢?

北上嫁人嗎?

Elvis said...

cheryl,

又話時話

我真係識唔倒冇人追既港女, 唔通真係生活圈子問題。

陳大文 部落 said...

其實,近年港女問題係改善左,及重要的是,高深了,不再是單純互相比拼和揶揄男性。

事實上,以我毫無科學根據的印象中所接觸的女士,也沒有強調要高談【沙樹比亞】,而男士們只懂賭波 賭馬 + 散慢 ,又是有理由被拒之門外。


但【時代女性】,【城市精英】,已令不少有大學學歷的女士不能回頭。因為她們已看得太多高檔事物,已屬超現實。

現在,北上娶妻的情況,已從以往的【中餅窮中坑】,轉為 2X - 3X 有正常職業、有非豪宅但普通自置物業、銀行有多少儲蓄的精壯派,而娶的【大陸妹】,也是城市的,不是鄉下婆村姑。

《 那些大陸新派少婦,樣貌相當不俗 》


這些精壯家庭,是目前香港社會重要的構成原素,但始終不能比拼香港 OL 世界的【 貝沙灣 + L K F + 才俊搶包山】的期望。

而在中國人的【海味舖揀花膠托價】的智慧下,又怎可以隨便說自己沒人追捧呢?

Kate said...

"好男人都死到哪裡去了?" 當真是我們一個很大的煩惱。

會計師文彩浪漫,會奏會唱,自然係港女喜歡的對像, 上面個link o既人都話不知有幾多曾為佢流淚 (聲線和42in胸肌更加是 bonus (笑))

又好似博主Elvis,做科研但又精通文史哲, 當過講師, 文彩一流。想應以往應也獲得唔少港女青睞, 雖然自稱係媾不到港女的可憐蟲, 應該都係水份居多 (或者只係鍾意洋妞? )

好男人去晒邊度? 好似呢類港女心中既對像, 大多都遠走他國 , 點會令人唔慨嘆? 留低的一係名草有主, 一係就係玩 "古惑仔online" 的一類宅男了

黑人 said...

一個男人追幾個就未有聽聞

反而跟不少女性朋友熟絡了,開始會向我投訴身邊的男友點點點,仲暗示或明示自己考慮緊其他選擇。

有三個case,個男仔都係殷殷實實,萬零二萬蚊人工慢慢上。反而係個女仔性格硬淨,覺得咁樣太慢(加上自己步入2字尾),開始考慮其他alternative

有時都會諗,咁搞法,查實香港人點繁殖既呢?唔通真係要「掌握創業機會發展一盤生意」果d月入十萬人士,先至擺得平?

Elvis said...

黑人,

你講既騎牛搵馬, 我見過太多。

我篇文章講既就係, 點解呢班港女, 會覺得自己搵倒「馬」呢?

咁係因為, 身邊的確係有「馬」, 甚至d 「馬」會來追佢地。

但係大家, 究竟明唔明咩係《鴿子洞定律》呢?

Elvis said...

Kate,

我是可憐蟲啊, 貨真價實, 童叟無欺! 寫舊 blog 果時, 出面都不知嚮幾多 forum 比d 港女講, 話我一定係媾唔倒港女先咁大怨氣播。

冇港女會睇得上的, 追殺就有份。

Elvis said...

黑人,

你話冇一個媾幾個?

還記得我提過 "fight club" 果班青年才俊, 有邊個唔係一個拖住四五個係身? 七八個都有......

Anonymous said...

《鴿子洞定律》唔係講緊港男比港女多
而港男令港女持續驕傲嗎?

睇完comment之後有d混淆...

天海和尚 said...

anon,

佢係講緊, 港女持續驕傲, 係因為港女仲有好多人追。

但事實係, 港女比港男多, 按照《鴿子洞定律》應該一個港男分倒幾個港女先係

分唔均喎, 點解? 咁係因為一個港男同時追緊/擁有複數既港女囉

港女仲係唔驚死, 只係因為佢第比個好多人追既錯覺呃左

Anonymous said...

TK

"有三個case,個男仔都係殷殷實實,萬零二萬蚊人工慢慢上。"

有D明"步入2字尾"的女性開始考慮其他alternative。男仔萬零二萬蚊人工慢慢上再加女的差不多或更高人工,一頭家的開銷應該OK。不過"男仔都係殷殷實實"可能暗示,未過人世經已悶死或激死。女嘅都2x歲啦,仲邊得慢慢train男仔溫柔體貼呀!

黑人 said...

> elvis
你班才俊,俾到你有一百人好未?
以一敵八,頂龍消化到八百個港女左右咋喎
九牛一毛耳

(才俊係咪會換女朋友呀?)(係!)
(咁港女個市場係咪一樣有機會食得晒呀?)(係!)
(咁鴿子洞理論成唔成立呀?)(成立!)

上完洗腦堂就有呢d後遺症

陳大文 部落 said...

我唔知我有無錯誤解讀,我睇完篇文,其實係曲線地話:

港女嬌傲又點,慘得過仍然願意【中】個頭埋去的仔(或佬~)多的是。

反正有的是市場,嬌傲咪嬌傲囉,慘得過有人卜埋嚟。


不過,港女問題係好似有啲啲改善左既。同啲男仔開始醒覺,都有點關系。

陳大文 部落 said...

黑人,你講果類 case ,我也遇過類似。

即是個男方無乜唔妥,又唔係樣衰,人工 OK ,有點平凡 ( 根據香港標準 ~) ,人品無乜唔妥果隻。

個女友樣貌一般,OL ,degree ,都會好樂意被溝,但好快就挑剔。

而女方共通點係,職位高又唔算高,但又會有一兩丁 OL 妹妹做【o靚】果種。

陳大文 部落 said...

[係因為一個港男同時追緊/擁有複數既港女囉...]


天海和尚: 唔....你可以這樣理解,但實際應該就唔係,你見到果啲一男拖幾條女果啲,有好多係出嚟 wet 出嚟玩果種,如果正正常常果種,要一男拖幾女係少啲。

《 純個人意見而已 ~》

陳大文 部落 said...

不如用【超級市場搶米】比喻吧。

1. 米貴,加了價。

2. 你可能只需要一包米後備

3. 你驚唔買多點,米價會更貴。

4. 於是你搶購我又驚執輸,大家搶住買。

5.....結果,米價想唔貴都唔得,人多買,唔憂無市場。


香港適婚年齡女多於男,本來應該男士可較易追女;但男認為【喂,多女喎,搶啦!】,於是你又搶我又追,這樣,女性市場便形成相反發展,因為不憂無市。

天海 said...

陳大文,

不如用【超級市場搶米】比喻吧。

1. 米貴,加了價。

2. 你可能只需要一包米後備

3. 你驚唔買多點,米價會更貴。

4. 於是你搶購我又驚執輸,大家搶住買。

5.....結果,米價想唔貴都唔得,人多買,唔憂無市場。


香港適婚年齡女多於男,本來應該男士可較易追女;但男認為【喂,多女喎,搶啦!】,於是你又搶我又追,這樣,女性市場便形成相反發展,因為不憂無市。

--------------------------

呢樣咪就係博主所講, d 男人四圍溝女, 見女就溝, 結果攪到好多女都「以為」佢自己有唔少人溝囉。

實情係, 果條女同好多人 share 緊。

仲有, 你話一男拖幾女少, 我身邊起碼有幾十單囉。

人一件 said...

《一位港女冇人追又同時追幾男仔》

其實係有的,應該說,她 / 她們未必是十分【港】,是有些少港女特質,但又未至於臭四。

現在的港女問題,已變了質,層次高了,已不是看不起男士這方向,而是女性市場內部的角力,和【獵食】的角逐。

優質的男士比以前更搶手,而一般( 但未必很差,是一般 )的男性,便更輸蝕。

至於天海網友提到的一男拖多件女的問題,只能說各生活層面的人和事有別了。

Elvis said...

黑人,

我識既, 都有幾十個。

咁我諗全香港絕對唔只100個囉。

Jane said...

Cheryl,

他在加拿大, 我有他電話都無用啦

Anonymous said...

呵呵,好多男仔話自己一拖幾,唔可以話無 gei,但聽左就算 la,講 jur。

Francis said...

樓上果位,

現實反而調返轉。

我相信有更多一拖幾的港男, 係一拖幾都唔會話比人聽的, 以保萬全。

實際數字應該遠較我們認識的為多。

cheryl said...

Jane - 啊,你又估佢唔到。人哋成日無啦啦番香港O架嘛。好嘢值得等,yeah~

Elvis - 洗唔洗我PIMP吓你? 我識親D港女都幾正冇人追。(當然要求亦都高,but oh well,既然咁多優質港男喺度咁應該係同一個POOL嘅)

Jose said...

你一寫依o的topic又幾十個 comment 囉

睇來大家都係鍾意你寫依o的

不過一陣你可能又嫌閒人太多就封筆唔寫了, 到時又寫埋o的趕客o既深o野

路人癸 said...

Elvis兄啲深嘢又點會趕客呢,至少一定吸引到不少優質港男。眾港女最好學下欣賞喇。

evie said...

鴿子洞定律..係唔係指有 d 人因為就手而去追同一個女仔咁?

因為鴿子洞嘅排列方法係有機會影響鴿子入邊個洞的機率吧?

evie said...

《鴿子洞定律》係唔係指有 d 女仔多人追係 random event, 同埋因為有 d 人見個女仔就手所以人人都追佢?

我諗鴿子飛入邊一個鴿子洞都幾 random 的, 同埋鴿子洞嘅排列方式都會影響一個鴿洞會唔會多過一隻鴿入去的機率吧.

小泽 a.k.a. DSvT said...

你好,
第一次过来坐坐~

对哦。。。
现在是男人少的时候,可是没个女生都自夸多于一位男伴,真的是有少少问题。是不是算错数~


Life beside the edge

Anonymous said...

真想去探訪一次位於廣西盧沽湖邊的”摩梳族”
女系社會 重女輕男 沒有婚姻 只有”走婚”

哈哈 其實單身還好啦  
生活是正餐 拍拖是甜品
婚姻是將正餐甜品混合一起
味道變怪了(只是個人感想)
自言