Saturday, August 2, 2008

不讀的書

近有新交友人著我薦書,我謂生平最怕答此等問題。一來小弟乃無名之輩,中年宅男,焉敢薦書?當覓名人垂詢為佳。例如葉劉學成歸來,曾向記者謂香港學生應多閱讀,繼而推薦一二洋書,謂讀之大有裨益。區區對該書聞所未聞,即感葉劉閱歷之豐,學問之淵,遠非己及。嘿嘿。

以區區之淺陋,又豈懂薦冷門洋書?要我Scan了某本保加利亞30年代左傾浪漫小說家之作品封面,放在Blog上供奉,實在做不出。當真要薦,也不外《石頭記》此等大路野,無黎味道。

二來嘛,青菜蘿蔔,各有所愛。區區心中之益卷,君或視如敝屣;我說《石頭記》是正野,你卻覺「幾米」更有深度。所以薦書此事,還是不作為妙。

薦書雖不敢,卻能談談我不讀之書。

步入三聯商務,門前那張桌上的書,區區礙於文化有限,悟性極低,所以看不明白。例如那些「心靈龜湯」,「向左嘔向右嘔」,「女人來自火星男人來自金星」,「窮媽媽富媽媽」,「誰偷走了我的蛋撻」,「地獄裡遇到的五個人」,小弟一生中都不曾讀過一頁。

見識如此淺陋,自當甚感慚愧。常有些洋港女,閱畢上述某書,如獲至寶,便拿書中一兩句soundbite來問我。例如:「喂﹗你有冇睇過《女人來自火星男人來自金星》?入面有句......。我覺得佢講得好岩喎,你應該學下野啦。」此等遭遇,我生平飽受不下二十次。只好答曰:程度不足,從未看過。而最為詭異的,是多年前生日,有港女從香港越洋寄了本《女人來自火星男人來自金星》英文版給我。納悶之餘,亦不禁心中恍然:原來我於你心目中是懂看此書的。太也抬舉。

新交友人說,上述的書她全看過,之後大叫回水。其實嘛,閱畢寶籍叫回水,是你不懂欣賞喔。

38 comments:

Leona said...

因此呢,女孩子看什麼書,也不要隨便讓人家知道,免被人說淺薄啊。

我也勸過女友,下次人家問你正在看什麼,你不懂答時,就說《老人與海》或《基度山恩仇記》好了。

總比答什麼金星火星的好。

Elvis said...

其實看甚麼書都不是問題。我是人到中年,還會看漫畫,甚為弱智。但我起碼不會讀完《星矢》如獲至寶,四處叫人買來看。

我最怕就是被人叫去看甚麼金星火星之類。但這卻是時常遇到的之事。

記得十多年前,有女友因為我不肯遷就她,便說我不了解女人,要求我去看某書。書名忘了,但肯定是那種「進門後第一張桌子的書籍」。「你睇下呢本書啦, 你睇完就明女人點諗架啦。」潛台詞就是說,如果你了解女人,就會認同她。聞之不由得心下苦笑。

無獨有偶,寫舊blog的時候,也是有讀者(相信是女性)留言,叫我去讀金星火星。相信其潛台詞和那名女友相同。

這是一件極正之事。

小瓶子 said...

我所有的女仔朋友, 都没有人看《红楼梦》,《走向共和》,《二月河的清帝系列》,勉强推荐这些书, 都没有用.

觉得那本书好看, 然后推荐给朋友, 没有不妥啊, 反正不是逼朋友一定要看就行.

我有看过《Why Men Don't Listen and Women Can't Read Maps》, 觉得都几搞笑呀. 又例如漫画《The Liar Game》, 我觉得好看, 也会叫人上网一齐睇哦(绝对侵权行为!!). 这些书/漫画,确实是比较容易接受嘛.

为什么看消闲书/漫画, 要视为肤浅弱智,羞于启齿呢?

另, 《人性的弱点》这本书我觉得不错, 在此推介一下.

Yun said...

頂! 有時真係好想打鍋金過你!

(唔好問點解﹐係感覺來的。)

Elvis said...

冤枉啊大人,小人無罪。

Elvis said...

小瓶,

你有冇睇過《星矢》啊? 入而有句話:「對付聖鬥士既招數,用第二次就冇效架啦。」我覺得好有道理囉,又教倒你做人。你快d 買晒全套黎睇啦。再唔係我借比你都得。

小瓶子 said...

小瓶,

你有冇睇過《LIAR GAME》啊? 入面用了许多数学推理同心理学的理论(eg.Games Theory) 来组成多种让人决战的游戏. 我覺得好好睇囉,又教到你心理学D野。你快d 买来睇啦。再唔係我比嗰网址你都得。

http://comic.kukudm.com/comiclist/420/index.htm

真系好好睇好架, 唔系讲笑. 哈哈.

小瓶子 said...

突然想起一样搞笑0野. 我凝住你将来会娶一个最港女的港女, 然后生一堆港女出来, (可以参考Pride and Prejudice 入面Mr. Bennet的角色), 跟住你就可以名正言顺继续研究港女, 成为伟大的哲学家.

哈哈哈哈哈!!!

新交友人 said...

最慘係我大嗌回水(其實仲有爆粗)之后 反省過 應該係我膚淺冇慧根 所以領略唔到寶籍精妙之處 於是下次有類似寶籍推出 又再次落搭 (當然亦再次爆粗)

從今以后 在下也只好認命 與該等寶籍實屬無緣 謝過 Elvis兄點化之德

Ta said...

之前TVB有套劇 好似係蔡少芬 開口埋口 ‘小王子’ 結果大批港人對‘小王子’ 趨之若騖 當然亦有 ‘港女’型女孩 我見過有同學拎著本‘小王子’行出行入 見人就大談‘小王子’

其實真正能讀懂‘小王子’的又有幾人? 我覺得‘小王子’被他們强暴了

不知泊主拒絕薦書 是否想防止强暴罪行在‘港女’型人群中漫延?

readandeat said...

哈哈﹗

搞到我也手痕想寫一篇。

人到中年?睇你張相唔似噃。

什麼叫看漫畫叫弱智?此言差矣。沒看過《星矢》,看《亂馬1/2》笑到標眼淚而已。

陳大文部落 said...

哈哈...唔止「心靈龜湯」,「向左嘔向右嘔」架...

而家書店最當眼既,係「如何一秒鐘內炒股發達」、「在心靈深處的一刻愛情」、「時代女性 Step by Step」....還有「世界盡頭的一秒鐘沉思」....等等。

而且好多都係用「嘅、囉、唔係化、好爆超喪勁屈機、我好 sad 囉」呢種超文化語體寫出來架。

動漫 Maggie 都出書談心路歷程啦。

陳大文部落 said...

我無乜睇星矢,我睇北斗之拳。

北斗....五指裂彈...北斗爆裂拳...

Ta said...

To readandeat:

你咪鬼信泊主啊 咩中年 咩弱智 佢最興貌似自謙實為串人的了 信佢一成都死! :p

** 飛雪素素 ** said...

ta,

哈?? 乜原來之前TVB有套劇呀蔡少芬 開口埋口 ‘小王子’咖?? 我突然間覺得我多年來喜歡嘅嘢原來依家cheap咗好多!!我好灰!!!!點解要咁對佢!!!!點解!!!!

Elvis,
《星矢》「對付聖鬥士既招數,用第二次就冇效架啦。」<----所以有D男人以為送花係絕招。

《足球小將》理面呀 勞比度叔叔都有講金句-「做咗後悔好過無做後悔。」

readandeat said...

to ta:

我信架﹗

陳大文:

那我比較暴戾些,我喜歡看《烙印戰士》,究竟結局篇出了沒有?

Ta said...

To ** 飛雪素素 ** :

係呀有呀 咩 ‘妙手皇庭’ 之類 我冇睇過 都係之前提及那位同學話我知的 我覺得佢唔似係會睇 ‘小王子’ 嘅人 咪問佢點知道呢本書嘅 佢先話我知係蔡少芬
成十年前嘅事咯 但而家都猶有餘悸


To readandeat:

咁祝你好運! 阿們!

陳大文部落 said...

readandeat:

@@~ --->《烙印戰士》...

我只係睇左少少,俾係 link 你頂一頂癮先啦。

http://www.manmankan.com/html/83/index.asp

陳大文部落 said...

「妙手仁心」同「壹號皇庭」

Yun said...

> 其實真正能讀懂‘小王子’的又有幾人? 我覺得‘小王子’被他們强暴了

哇哈哈哈!!

Elvis said...

readandeat,

七字頭既人到左而家都算係中年架啦。

漫畫只是一個比喻。不是一個人讀了甚麼書就會顯得膚淺。漫畫我也讀,但我不會說:

你有冇睇過《星矢》啊? 入而有句話:「對付聖鬥士既招數,用第二次就冇效架啦。」我覺得好有道理囉,又教倒你做人。你快d 買晒全套黎睇啦。再唔係我借比你都得。

Elvis said...

飛雪素素 ,

唔, 你真係可以係《星矢》度睇倒做人道理囉。佩服。

Elvis said...

小瓶子,

我同你賭一餐飯, 我一定唔會娶個非常港女。

(為了這餐, 今晚就落pub篤波先 :p)

Yun said...

你真係好中意花恤衫播。。。

(點解好似係同一件既?!?!)

(呢張﹐老D既。。。)

** 飛雪素素 ** said...

ta,

我還記得第一本小王子是媽媽送給我的,很小的時候看過一次。之後再看已是剛上大學的事了。小王子有拍過戲(1974年),記得當年媽媽是從明珠台錄給我看的...戲中的金髮小男孩超可愛的。

Elvis said...

上果件係間條黎架。

小瓶子 said...

Elvis,

有时侯人算不如天算, 万一娶返来先变港女, 甘点算呢?

仲有, 生出来嗰D, 唔听你套理论, 系要做港女, 甘你点呀?

哈哈哈哈哈...

小瓶子 said...

你有冇睇過《完全自杀手册》啊? 入面分析晒所有自杀方法的利弊, 我覺得好有道理囉,又教到你点自杀。你快d 買黎睇啦。再唔係我比嗰网址你都得。

(纯粹讲笑, 米恼呀.)

陳大文部落 said...

唔好意思,請問現在還有沒有可能再找到『完全自殺手冊』呢???

我記得其中一項,係「被熊人打死」....

凱恩 said...

>readandeat

呀,見倒有人講烙印戰士。 (唔好意思,我睇漫畫多過睇字的)

結局篇幾時出,係要睇作者仲有幾多車同幾多樓要供架。依我所見,睇怕你供完樓作者都未供完喎~

-----------

死喇,「進門後第一張桌子的書籍」我都睇過好多喎。教人做人其實無咩唔好丫,大家層次唔同,版主唔需要呢d書而已~
不過我都認,火星金星本野真係廢左d。好多水份呢…

Arael said...

‘小王子’ 是我見過最反科學的書之一。
細路如果在沒有大人指導之下亂看,以後物理生物都一定肥硬。

readandeat said...

凱恩:

我兩年前已供完樓了﹗車也不用供,現款買的。

陳大文:

感激﹗我上次回港清理舊書,將十幾本《烙印戰士》丟了出街。希望有人執了回家睇啦。

ta:

信博主--->祝我好運?

唔明。

博主:

咁我喜歡看的漫畫也不會硬銷給人,人各有志,有啲嘢勉強不來的。

老麥 said...

readandeat, 勁呀,連烙印戰士都有睇!

Leona, elvis, 其實女仔做回自我不是更好?硬要說自己看古典名著,其實同男仔胡吹自己在甚麼大公司工作一樣,只會增加自己出洋相的機會...

"新交友人說,上述的書她全看過,之後大叫回水。其實嘛,閱畢寶籍叫回水,是你不懂欣賞喔。"
愈罵愈要睇,人之常情?

書我就唔推啦,但呢個blog 就真係幾好睇,嘿嘿

老麥 said...

"新交友人說,上述的書她全看過,之後大叫回水" -- 愈罵愈要看,人之常情?

Leona, Elvis, 要一個睇火星文大既港女扮睇老人與海,同叫一個地盤苦力強充會計師一樣,結果都會穿崩,何苦呢!

readandeat, 你好勁呀,竟然睇過烙印戰士,我都未睇過!呵呵

高妹 said...

中年宅男? 咪教壞細路啦, 嵇康話人"上壽百二十, 中壽百年, 下壽八十年"呀, 不竟者皆夭耳, 別教人做短命鬼.
話時話, 你文中講幾本書我又真係未睇過, 不過大家都話好睇既紅樓夢我都一樣睇唔入, 哈哈! 不知是不是人化了, 現在愛看的是莊子, 希望遲d可以得道, 好似莊子咁實踐到魂遊太空.....哈哈

Elvis said...

高妹,

你鍾意睇莊子, 博大精深, 遠勝我地呢d 凡夫俗子了。

先秦諸子中,我還是覺得莊周學說最有道理。所以我也喜歡讀土產作家鄭穎濂談莊子。

有理歸有理, 我卻覺得韓非最實用。

Elvis said...

老麥,

其實讀甚麼書, 我覺得都不影響你個人修為。例如我有一個朋友叫「大夫」, 勁人也。但如果她有一天告訴我她在讀《金星火星》, 亦不會影響我對她的評價。

不過我最怕就是別人對我硬銷一些我不喜歡的書。有趣的是此事經常發生, 而且大部份都是女人。可能我太走運。

** 飛雪素素 ** said...

arael,

哈.....又係啦。咁你去要求佢地响本書嘅cover 加警告字眼 -- 要有成人指導下才可使用等說明 =)